پیام تسلیت فوت مادر مهربان الحاجیه نادره طلوعی(اسعدی)

در رثای مادر عزیز:

محبت باغینا باغبان اولان
گونول گلشنینون صفاسی آنا
اولموشام فراقین دردینه دچار
آی منیم دردیمون دواسی آنا

ای منیم گوهر عشق ازلیم
دیوان عمرده شیرین غزلیم
حیف اولا الیندن اوزولدی الیم
یوخوموش بو دهرین وفاسی آنا

یوزومی گؤرنده گولردی یوزون
منه جان وئرردی صحبتین سؤزون
نه گلدی گؤزلیم یومولدی گؤزون
یومولان گؤزلرین فداسی آنا

الفتین دوشوبدور جان قفسینه
حسرتدن یانورام غم شعله سینه
گئنه ده عاشقم لایلای سسینه
خاطریمده قالان صداسی آنا

سن سیز دای مراده چاتمارام ننه
فکروی باشیمدان آتمارام ننه
گجه لر گؤزیوموب یاتمارام ننه
قلبیمده هجرین وار یاراسی آنا

عزتیم سنیدون شانیم سنیدون
روحیم روانیم جانیم سنیدون
داماردا دولانان قانیم سنیدون
جانیمون گئدوبدور قواسی آنا

بیر گجه یوخوما ایکاش گله سن
دانشوب منیلن دیوب گوله سن
ئورگیم دردینی گؤروب بیله سن
نه چتیندور آنا عزاسی آنا

داغلار بویونجا واریدی صبرین
خدمتیم آز اولدی بیلمدیم قدرین
آلارام آغوشه جان کیمی قبرین
ای ئورک ملکینون بناسی آنا

عکسوه دوشنده گؤزوم آغلارام
سیل سرشگیمی یوزه باغلارام
آناوای دییرم ئورک داغلارام
پوزولوب شادلیقین اساسی آنا